23.08.2016Golo peske o Valery Novoselsky
Bare pharipnasa amare ginde vakerasa tumenge kay ko August 20, amare themestar golo peske o Romano aktivisti tai redaktoras e internet mrejakoro ”Roma Virtual Network”, o Valery Novoselsky. O Valery sini ki Riga, Latvia te sikavel ekh muzikalno Romano festivali othe. O pharo haberi andas amenge o Roma Times: http://www.romatimes.news/index.php/en-us/nevipena/121-nevipe/1248-the-famous-romani-activist-and-editor-of-roma-virtual-network,-valery-novoselsky-has-passed-away
O Valery Novoselsky biandilo ko April 15, 1970 anko Dnepropretrovsk, Ukrayna, adale disende i Savetsko Unia. Anko 1995 nashela ko Izrael. Anko 1999 lela te kerel i Romani Virtualno Mreja kayato ancig uli o em baro kanali kava dela informaciya e romenge. Adaja mreja sini tribuna milya romenge, romane tai pro-Romane organizaciinge, aktivistinge tay savre kala keren bute e romenge tai reselas dji milya manushende ando sasto themeste. O publikacies andi mreja sini but: haberya, kon so phenela, analizya… I mreja barili but ancig tai chindili cikne, “nacionalna” romane mrejende, kala denas informaciya katar o konkretna thana: sar “BulgararianRoma” tai aver. Adava ulo kana nanas Facebook, tai nanas Twitter.
Pe butyasa o Valyos kerdas ek virtualno romano them, kavato na djanelas so si phanlipe. O chiba sine but: anglikani, o nacionalna chiba, tai amari romani. I mreja thodas lila, haberya, kava so phenel… Nanas cenzura. I ek cenzura kaja o Valery thodas sini te terdyarel o personalna chingara mashkar ko Romane aktivistya, tai te dikhel e informaciya te ovel korektno tai chechkani (Sigu angla te djalpeske, puchle e Valerys tai ov phendas kay o chechkanipe e informaciyakoro trebul te dikhas laches tai te ne sigyaras).
Sar savre thema kala sine kerde e manushendar, li e Valyoskoro them, leskiri mreja, nana sini perfektno. But droma vakerelas o Valyos ta pharo leske kay nanay debatya, kay but romane organizacies nana vakerena tai na sikavena so keren, ta o chingara maskar ko Romane „liderya“ ovena pasa dis. But droma o Valery achiolas rigate, bidikhlo. O manusha siklile te den anki mreja, te ovellen i Romani virtualno mreha. But hari manusha mangle te keren buti adale mrejake. Ol nana dinepes godi kobor but vogi dela pester adava manush te kerel adaya mreja.
Te keres ekj sasto them si e Devleskiri buti. Ov sa pashe dji ko Devel, Valery! Ka rovas tuke!
